(( أيـتـهـا الـزوجـه قـفـي مـع نـفـسـك وحـاسـبـيـهـا ))

(( أيـتـهـا الـزوجـه قـفـي مـع نـفـسـك وحـاسـبـيـهـا ))

والسلام عليكم ورحمة الله وبركاته

أختي الفاضله:
إجلسي مع نفسك صباح يوم من الأيام
بعد أن يغادرون عيالك وزوجك السعودي إلى العمل.
راجعي يوم الأمس الذي مضى لحظة بلحظة
وأجيبي عن الأسئلة التاليه:

بسم الله نبدأ

صباح الأمس الباكر من أيقظ زوجك للعمل؟
أنت أم الساعة المنبهه؟
إذا كانت الساعة أين كنتي في هذا الوقت ؟

إذا كنتي أنتي كيف أيقظتيه؟
وبأي صوت نبهتيه؟
وفي أي صورة كنتي عندما فتح عيونه؟

بعد أن استيقظ ودخل الحمام
و خرج والأمل يحذوه في وجبة إفطار
هل كنتي جهزتي له إفطاره في الوقت المحدد ؟
(حتى لو كان مايحب يفطر بدري
على الاقل لو كوب قهوه والا شاهي والا كاس حليب )

طيب تعالي

:
قبل أن يخرج للعمل كانت ملابسه اللي بيداوم فيها جاهزه ؟
(عطرتيه قبل لايطلع وقربتيله جواله ومفاتيحه وشماغه وكل مايلزمه في الدوام )
!!!!

بعد ماخلص لبس (واستعد للخروج) ودعتيه ؟

والا تدرين
إختاري أجابه واحدة مما يلي:

:
1- طلع وأنا نايمه .

2- صحيت من حركته في الغرفه، فتحت وحده من عيوني وقلت: مع السلامه.

3- كنت جالسه بالصاله، وهو طالع قلتله
لاتنسى الأغراض اللي وصيتك عليها.

4- رافقته للباب وودعته بقبله ودعوه حلوه .

هاه اخترتي ياعسل ؟؟؟

:
طيب نرجع مره ثانيه
ياللي تحسين انك مظلومه ومسكينه وحقوقك مهضومه

لما وصل زوجك المكتب (طبعا إذا قامو يفطرون
الرجال المتزوجين بالمكتب اعرفي وش أنتي من حرمه)
مافكرتي في يوم ترسلين له مسج حب ؟؟
ماقولك كل يوم بس على الاقل في الغالب ..

تالي النهار وهو راجع البيت من العمل
أستقبلتيه؟ ووشلون؟

طلع فوق وبدا يغير ملابسه؟
هل كنتي معه ونزعتي له ملابسه و..و.. ثم علقتيها ؟ (ولا خليتيها منطوله بطرف السرير)؟؟


طيب هالحين
يبي يدخل الحمام وياخذ دش
اذا كان متعود
بعد الدش يبي يسترخي اكيد
مافكرتي تسوينله مساج ؟



:
الآن يبي غفوه قبل الغدا
هل ساعدتي على توفير الجو الهادئ؟
وابعاد الاطفال عنه ؟؟
وتاجيل كل المواضيع !!




لما صحى من هالغفوه
هل وجد الغدا جاهز
ولا هو اللي جابه معه من المطعم؟
والا جلس يستنى الين يستوي لانك كنتي مشغوله بالتلفون ؟؟



بعد الغدا أكيد يبي شاهي
قدمتي له الشاهي بدون مايطلب
وجلستي معه وسولفتي وكنتي مرحه وبشوشه
سالتيه وش كان يومه ؟

:
الآن فتره مستقطعه إلى الليل وشلون قضيتوها؟
بالليل وقبل النوم على الأقل ساعتين (إذا فيه عيال أكيد تكونين نومتيهم والا انا غلطانه)؟؟



اسالي نفسك وش كنتي لابسه بهالوقت ؟
كيف كانت رائحتك؟
وشلون كشتك ؟




طيب هالحين اسالي نفسك بعد ماتجهزتو للنوم
وأنتي رايحه السرير وش كنتي لابسه؟
كيف وضعية النوم مع زوجك؟
(وضعية حنان ؟؟
ولا كأنكم أثنين أصدقاء أستأجروا غرفه بفندق
وما لقولهم الا غرفه بسرير واحد (كنج بد)
وكل واحد نايم بجهه
ومعطي خويه ظهره )
؟؟؟؟





بإختصار لكل الأسئله السابقه
كنت بس ابيك تراجعين نفسك
وتعيدين حساباتك وتضبطين وضعك :



هل كنتي أنثى مع زوجك السعودي
وعيشتيه جو زوج وزوجه بينهم كل حب وموده ؟





المهم والمطلوب من هالموضوع حتماًَ
هو استشعار حق الزوج




إلى كل إمرأة سعودية تبحث عن زوج يدلعها ويحبها



ضعي درجه من 100 على كل سؤال
ووزعيها بحسب الأهميه
ثم أجيبي الإجابه الصحيحه
ومن ثم اجمعي الدرجات



الآن عاد
نجي للجد والجد الله الله عليه




عيني بعينك وخلك شجاعه مع نفسك وجاوبي



مابيك تجاوبيني انا
ابيك تجاوبين نفسك بس




كم مجموع الدرجات اللتي حصلتي عليها؟
0% ولا 10% ولا 50% ؟




؟؟؟؟
طيب هالحين ياحلوه
إعتبري النتيجه هي نسبة إهتمامك بأرض زراعيه عندك واعتبري الأرض زوجك
كيف بتكون الثمره اللي تحصدينها؟
وانتي تهتمين فيه كل هالاهتمام



(الثمره أكيد الدلع والكلام الحلو و... و....)





في الختام ياخواتي السعوديات
يامن تشتكون من ازواجكم السعوديين
ازرعو كل خير واهتمام وحب
وتاكدو باذن الله ان ربي ماراح يخيب املكم
فاحتسبو الاجر من الله
حتى تجنون الثمار





ملاحظة هامة / الموضوع طرح بهذا الاسلوب كتذكير للمتزوجين و المتزوجات و المقصرين والمقصرات فقط .
لا للاجابه على تساؤلاتي

اعذروني على هالطرح
فهو ليس تحامل عليكم بقدر ماهو وقفه مع النفس ومحاسبتها

دمتم بوافر الود والمحبه