قصيده عابره

11-01-2014, 03:33 AM

شفت العليل اللي تعب مافيـه مـن يلقـى دواه
ماله دوا يعني يعيـش بعمـره الباقـي عليـل

عليه لو جار الزمن والا أكثر أصحابـه جفـاه
لا للزمـن عنـده بـدل ولا لأصحابـه بديـل

مثله مثل مركب هوى والريـح ماتتبـع هـواه
إن ماغرق بإعصارها لازم عن الوجهـه يميـل

وترى الشجاع اليا وقع مكسور في قبضة عداه
يموت بيديهم عزيـز أحسـن ولاينجـى ذليـل

وترى الضرير إليا غدت في زحمة الدنيا عصاه
يضيع بـدروب الشقـا مالـه مقـدي أو دليـل

كانت قصيده عابره مـدري حكايـه أو وصـاه
والا روايـه مؤلمـه والجيـل يرويهـا لجيـل

القلب نادى يالخوي مافيـه مـن يسمـع نـداه
في غربةٍ مامرهـا طرقـي ولا عابـر سبيـل

سمعت لي ذيبٍ عوى أضحك وانا أسمع عـواه
لكن تكدر خاطري لحظة عواه أصبـح عويـل

الذيب جاه اللي كفا والقلب جـاه اللـي كفـاه
والكل منا يالخوي لـو تثقـل حمولـه يشيـل

تدري وانا أدري من قديم الجمر يحرق من وطاه
لاتامنه ياصاحبـي حتـى ولـو شفتـه مليـل

واللي زرع شوك الندم لايزعل اليا مـن جنـاه
واللي يبي يجني بلح يرقى على جذوع النخيـل

والكلمه اللي بدلـت مـرارة الصبـر لحـلاه
راح الكثير من الشقـا ماباقـي ٍ غيـر القليـل

خل الأمل يرسم لنـا صـوره جميلـه للحيـاه
رغم الألم رغم العنا والهـم والحمـل الثقيـل

حتى الرجل لامن دنا يومه وقصرت به خطـاه
شف كيف تعطيه الأمل كلمة بعد عمـرٍ طويـل

كن الفرح في ناظره والحزن في بسمـة شفـاه
أنقى من دموع الفرح وأقسى من دموع الرحيل

جرح ٍ كتبته في ورق يمكن يحسه مـن قـراه
يلقابه إحساس ٍ نبيل يحـرك إحسـاس النبيـل