قالوا علامك صـامت وقلت ياناس
كثر الكلام يقل لاجله مقامـــــــي
الصمت حكمه والحكي مـصدر إفلاس
ولقيت في صـمـتي يزيد احترامي
الصمت له معنى وله ذوق وإحســـاس
مركب نجاتك في بحـور الظلامــــي
ترى الرجل صوره من الـراس للساس
ثم يتبين جوهــره بالكلامـــــــــــــي
إما نطق في كلمة ترفــع الـــــــرأس
تضفي على شكله جــديـد الاســــامي
وإلا يعود معدنه مـــعــدن نحــــــاس
يرميه سهمه بـعــد ماكان رامـــــــي
لا صار عندك من ثمـيـنات الألماس
خله بـصـدرك لين وقت التمامــــي
أخاف يطلعلك مـن الناس بـــــــلاس
وإلا سـفــيه ما يرد الســـــــــلامي
الله خلق خلقه على عـدة أجنـــــاس
وكلن يسوقه مذهـبه للأمامــــــــــي
والله خلق بالطير قمري وقرنــــاس
ووقت الهدد ما ينغزي بالحـمـامـــي
لا جال في صدرك من الهم هوجــاس
وعينك يحاربهـا لذيذ المنامــــــــــي
ونفسك عليله والفكر صار محتــــاس
اترك طمان القـاع وارق الســـــنامي
عليك بالعالي ليا هب نســــــــــناس
يبري الجروح الخـافيه والعظامـــي
وخلك لربـعـك دايم الدوم نــــــبراس
وخص القريب وخص ولد العــمامي
خلك لهم في داجي الليل مقـبـــــــاس
ولصاحب أصدق من حقوق الغمــامي
ربعك ذراك ليا لحق راســك البـــــاس
قدم لهم شربك ولو كنت ضـامـــــــي
وخلك لثوب الطيب والعز لبــــــــاس
واترك دروبٍ تنتهي بالحرامـــــــــي
وفعل الجميل وواجب الضيف نومـاس
ومن لا نفع بالضـيق نفعه عدامــــــي
بيت الكريم أبوابه بدون حـــــــــراس
وبيت البخيل يـعـد مثل الهدامـــــــي
كلٍ بها الدنيا نصيبه بـمقيــــــــــاس
ياخذ نصيبه لوجــفـوه الأنامـــــــــي
م/ن