افــرح ليا بان واحزن لاسـلا عنـي
إلين ماصرت في دور الهوى خبـره

تامرني انساك بنسى ويش يمنعنـي!
لكن لياجيت في بالي وش الدبـره؟

خذيتنـي ســــــالـي ودالـه ومتهـنـي
ورميتني شاعر(ن) ساهر على حبره

الله حسيبك على الضيقـه معودنـي
ياكاسر الخاطر اللي شوفتك جبـره

تطلب وانفذ وابي قربـك وتجهلنـي
كني طلبتك تحفـر البيـر بالأبـــره!

تقــول : يامكرم القيفـان تخدعنـي
واقول : بعدك كفنه وغيرتـه قبـره

طيفك على صدك وبعدك مصبرنـي
لو كان طيفك يشيل القلب من صبره

امهلتني للزمـن والوقـت مهملنـي
ياحر كبـدي على حاجات منثبـره

واللي سرق بالي وحيـره واشغلنـي
طــاريك لامـر وش دخلـه بالنبـره

موج الغلا يم سيف الشوق يدفعنـي
ياقرد حظي معى شــفـي وياغبـره

اليا طلبته يقـول اسـف وفارقنـي
اللي معى مايعـل النفـس ياكبـره

ولاانت ياحزبة الضامـي معذبنـي
متى نصادف طريق(ن) نلتقي عبره؟

ابتصــل فيــك لاا ! مانيب متعنـي !
اخاف لاقلت ( ألوو ) تخنقني العبره