ياليل جـر الآه والشـوق مـوال

وخلني اردد من شعوري قصيده

الروح ذابت والدمع سيـل همـال
والشوق يحرق والمسافـه بعيـده
ياليل شفني بغربتي ضايق البـال
أنزف جروحي والمصايب شديـده
مسكين قلبي كم تحمل من أهـوال
مالي حمـل والله ضربـه جديـده
إن قلت هان الأمر وتعدل الحـال
ترجع لي الذكرى وحزنـي تعيـده
ياليل تكفـى ودّ للولـف مرسـال
وسجل سلامي في صفايح بريـده
قله عساك بخير وشلون الأحـوال
قله فؤادي حيـل ينـزف وريـده
قله بدونك تالي الحـظ قـد مـال
قلـه غيابـك نـار قلبـي يقيـده
من غابت عيونه تحرّمت الآمـال
راح وخذا هالـروح منـي بإيـده
وقله بدونه صرت مادانـي أزوال
ماغير أصدد في الوجـوه البليـده
يمكن شبيه له في ثـوب وعقـال
يحيي أمل هالقلب ويعيـد عيـده
ومكانته والله من عمـر وأجيـال
هو نبض خفاقـي تاجـه وسيـده
اشرب واقهوي نازف الجرح فنجال
هيله دموعي والظـروف العنيـده
هذا طبـع الأيـام أدبـار وأقبـال
قسمه من الرحمن وكلنـا عبيـده
خلص الحكي ياليل وش عاد ينقال
وش عاد ينفع لو اسطـر جريـده
وآخر كلامي مسكنـه دوم بالبـال
لو هو نسى في القلب زايد رصيده