::


::


يا رفيف الماء .. وفجـر العيـد .. وأحـزان الموانـي
يا أكثر أهل الأرض طيبة قلـب .. وأسـرار ٍ دفينـه

المكان اللي هنـا .. مليـان ضحكـات ، وأغانـي !
والكلام اللي بغيت أقـول .. يحتـاج لـسكينـه !

شوفي الركن البعيـد هنـاك .. كنـه صـدر حانـي
هذا هو اللـي يليـق بـشاعـر وبنـت ٍ حزينـه !

أنسـي الشـارع ، وعتمـات الزوايـا، والمبـانـي
هاتـي يدينـك نلـف الغيـم ونشكـل مدينـه !!

عندي الليلة كلام وصمـت .. وأخـاف الثوانـي ..
تظلمه .. أو تظلم اللي فيـه كـم ضاعـت سنينـه

بـس لازم تسمعيـن الـلـي أبــي والا تـرانـي
لو بـأعيده لك .. نسيت .. ورحت أقول اللي تبينـه

شي واحد قبل ما أبـدأ .. مـا أبـي أي شـي ثانـي
يخطر فـبالك .. وأنا أكشف لك شعـور ٍ تجهلينـه !

إن أنا .. وبكل مـا تحملـه "أحبـك" مـن معانـي
كنت،وراح أبقى أحبك .. لين .. مدري وش هو لينه !!

بس والله ماقـدرت أنسـى .. ولا همـي نسانـي ..
لا ذكرت إنسـان .. فيـه أسـرار مابينـك وبينـه

كـل مـا تطـري علـي فكـرة هـواك الأولانـي
أشعـر إنـي أنطعـن مليـون مـره مـن يدينـه!

أشعر إن عيونـك.. الله مـا خلقهـا إلا عشانـي !
كيف كانت تبتسم له؟!.. قولـي إنـك تخدعينـه !!

صورة إنه كـان يمسـح دمعـك .. تزلـزل كيانـي
وكيف كان يلـم شعـرك .. ويتبعثـر فـي يمينـه

حتـى اسمـك يـوم رحـت أدللـه .. حظـي رمانـي
بنفس الاسم اللي يقول .. بذمتك ماهـي غبينـه !؟

وكني اللي .. كـل مـا أناديـك بالاسـم الفلانـي
أطلب النسيـان .. يتـرك منـه شـي ٍ تذكرينـه !!

لا تظنينـي أنانـي .. لا .. أنـا مانـيـب أنـانـي
لو سلمت من الغرق . بموت في ظهـر السفينـه!

يا إني مـا أكمل،وأعانـي .. أو أكمـل ثـم أعانـي
كل ما اسمع طاري اسمه .. أو تجـي عينـي فـعينـه!

أينا كان الضحيـه ؟.. وأينـا اللـي كـان جانـي ؟
مـدري !.. ولكـن قـراري لازم إنـك تقبليـنـه

مثل ما أكـره فكـرة إنـه واحـد ٍ ياخـذ مكانـي
ما أقدر أجلس في مكان إنسـان.. كنتـي تعشقينـه