لا جيت ابنسى واتراجع واسامحك
صاحن جروحي واشتكن لي طعونك

كلك خيانه قول .. وشلون ابمنحك
وش موقفك من شخص دايم يخونك !!

اكبر خطا.. لو جيت يمك اصالحك
اول تحــوّل .. لاتغــرّك إلحـــــونك

اللي تقوله صح .. لو كنت جارحك
(مير) انت غارق للاسف في ظنونك

وصفك نسيته بس .. باقي ملامحك
بنهيــك وانهــي بالنهايـــه جنونك

ماتستحــق امــد (كفي) واصافحك
مثلك غلــط عمــري وابحيا .. بدونك

لعبــت دورك شاهــداتٍ مســارحك
خدعتني واظهــرت خافي فنونك

كنت اعتقد .. قلبي هو ابرز مطامحك
اللي يبيــع الناس لجـــله يصونك

تعبت اسوق الشوق يمك واصارحك
اخلصت لك بالحب .. شوفت عيونك

لكن خســارة صرت غايــة مصالحك
ياليتني ماجيــت .. لحظــه بكونك

بالامس كنت بنشوة الحب .. امازحك
اخيل برقــك واتحــرى امــــزونك

واليوم من صفحة حياتي .. ابمسحك
هــديت صرحــك ثم طاحت ركونك

ولابي عيــوني لو تصورت تلمحك
اعلنت مــوتك .. وانسجن لي كفونك

وان جيت تطلب .. ترتجيني اسامحك
بهديــك طعنــه .. من بقايا طعونك