وقفت وأسال من عبر وشهي صفات الفيلسوف


وهل كلامه فلسفه … والا سكوته فلسفه


وهل ظهوره عالملا حكمه وهل بعده خسوف


انا اخبر اللي ينحني للعلم ما يأفل سفه


واذا نظر للشمس لم تكسف وفي عينه كسوف


واذا وقف بين القمر والشمس قالوا سفسفه


وقفت حتى انه غشاني اليأس وأضناني الوقوف


عود جلست ومن جلس ازداد همه وقفه


ومر بي شيخ كبير السن عالدنيا يطوف


حتى ولو ما تعرفه تستشعر انك تعرفه


قريت في عينه قطوف وفي تجاعيده قطوف


وفي ارتخاء صوته ثمر ويحثك انك تقطفه


مما قريت ان الزمن جبار وايامه صلوف


أيام تضحك من سعه وأيام دمعك تذرفه


مما قريت ان الذي بالحيل عالدنيا شغوف


يقول ابعسفه وهي لاميل يوم تعسفه


وقال لي لولا الشتاء لم يغزلون الناس صوف


واللي يبي يشرب من الماء العذب يصنع مغرفه


الليل ما يستر خبر والصبح ما يحفظ حصوف


والغيم ما يضمن مطر والسيف ما يلجم شفه


ما بين دقات الورق نفس الكتب نفس الحروف


لكن ترتيب الحروف يميز أهل المعرفه


لربما بعض العقول تموت من برد الكهوف


وبعضها يفقد صوابه من حرارة الارصفه


ما كل من ياقف على المنبر ولو عرف عروف


تصفيقنا للجاهل اللي ما يعرف عرفه


واللي بلا ظهر قوي تتعب عضوده والكتوف


واللي يبي يرقى على كتف غريب كتفه


ونقول هذولا أقوياء ونقول هذولا ضعوف


واللي يطبل للقوي يزداد ضعف واضعفه


والقصر اذا ساسه ردي ما تنفعه مثل السقوف


واذا كان له ساس قوي تأمن من الدهر اسقفه


في كل ما يفنى عبر ولكل ما يفنى خلوف


لو كان للفاني بقى لم نعرف اللي يخلفه


نشوف كل عيوبنا وندعي انا ما نشوف


وغيرنا لو زل مره قبل ياقف ننسفه


تبقى كتبنا عالرفوف حتى شكت منها الرفوف


حتى تذوب وتسمع لباقي البقايا حشرفه


ونمتدح فاخبارنا واشعارنا حد السيوف


والموت في حد السيوف ولا احد يستلطفه


نشكي على الظرف الظروف حتى شكت منا الظروف


وكل ما وافق هوانا لو خطأ نستظرفه


نحمل قلوب تشتكي منا على بيض الكفوف


واللي سكب دمعه على الماء المنسكب ما كفكفه


وكم تجمعنا كشوف وكم تفرقنا كشوف


ما من جديد يجمع قلوب البشر نستكشفه


نصطف اذا ابعدنا بعيد عن مواطنا صفوف


واذا رجعنا للوطن نكره نظام الصفصفه


وكلنا حاتم متى لفونا هل المغنم ضيوف


اذا لفانا معسر مسكين محد ضيفه


وكلنا اعني الرجال نفز اذا مرت هنوف


كلن يقول انا لها انا الذي مالي صفه


وحتى الذي وقف بعيد وقال انا عنها عزوف


والله لو تطرق على لحن الوصال ان يعزفه


الا الذي يخشى من المولى وفي عينيه خوف


هني قلب يرعوي ويخاف مما خوفه


هذي اجتهاداتي وحكمة ذالك الشيخ العطوف


خذ من عبرنا ما تشى واحذف اللي تحذفه


هذا وانا والله ما اكره مثل طبع الفيلسوف


وكل خوفي لا تقولون ان شعري فلسفه