نتآئج فيلم للمتزوجين
نبدأ الفيلم :
حدثني احد المتزوجين القدامى
(من امضوا اكثر من عشر سنوات زواج)
انه كان يسمع كثيرا عن فوائد الكلام الحلو للزوجه ومدى
تأثيره على العائله جميعاً يقول صاحبنا انه كان يضحك على هذا الكلام ....
ويقول انا شخصياً....
متزوج وزوجتي تعلم ومتأكده إني أحبها فما فائدة الكلام هل نحن بمسلسل تلفزيونى ويجب أن أُسمعها يومياُ إني أحبها.
المهم يقول صاحبنا كنت مضغوط بالعمل لمدة 3 شهور وحبيت آخذ اجازه لمدة اسبوعين وفعلا اخذت الاجازهـ
وفى اول يوم اجازه كنت بالصاله واتصفح الجرايد واتفرج عالتلفزيون
وكانوا يتكلموا عن الزوجه وعن فوائد اسماعها كلمات الغزل.
وخطر لي أن أضيع هالاجازهـ بفلم من إعدادي و إخراجى
وأسميه الضحك على الزوجه.
وبدأ الفيلم
من سمعت صوت الاولاد وهم راجعين من المدرسه ومعهم المدام
[المدام معلمه] .
لما دخلوا البيت مرت المدام من عندي رايحه لغرفتها فأوقفتها وقلت:
هلا وغلا هلا بعمري و نور عيوني،
فنظرت إلي وقالت:
الحمد لله أكيد تحلم !!
ودخلت الغرفه فدخلت معها وأعدت ما قلته لها مع حضنه خفيفه وخرجت.
وأثناء الغداء صرت أمدح بطبخها وأقول إني محظوظ
لأن عندى زوجه حتى وهى جايه من الدوام ومتعبه تهتم لي وتطبخ طبخ حلو ومو أي كلام.
بنت الحلال مو مصدقه وقالت الله يستر من اللي وراء هالكلام اكيد فيه شى.
وبعدالعشاء دخلت غرفة الملابس وبدلت استعداد للخروج مع الشله ولما طلعت للصاله لم اجد المدام كالعاده عند مسلسلها المفضل فدخلت غرفة الاولاد وسالت عن امهم قالوا بالمطبخ .
مريت عليها وقلت:
غريبه حبيبتى مو عند التلفزيون؟
قالت: بكره فطور المدرسات علي انا ،
(فخطر لي أن أكمل الفلم حقي) فقلت:
حبيبتى لا تفوتى المسلسل الى انتى متابعه وانا اجيب لك كل شى من برا ،
استغربت وقالت: انت تتكلم جد؟!
قلت: إيه .
كتبتلي اللي تبغاه واخذت الورقه وقلت:
خلاص حياتى وانا راجع أجيب اللي طلبتي.
ولما طلعت من البيت خطر على بالي
إني ما أروح للشباب الليله واجيب الطلبآت واشوف نهاية الفلم.
وجبت طلباتها ورجعت ويوم شافتني إستغربت !!
وظنت إني جبت الاغراض لاني بتأخر بالسهر
لان ما عندى دوآم.
لكن تفاجاءت لما بدلت وكانت بجنبى فحضنتها وقلت:
حبيبتى وش بتعشينى اليوم ، ورحت للصاله جلست .
المسكينه لحقتنى وقالت: يا ابن الناس قلّي وش عندك تراك خوفتنى ....
قلت: والله ما فيه شى ابد ..
وقامت من عندى ورجعت وبيدها مصحف < 
وقالت: تحلف عالمصحف إن ما فيه شي ؟
قلت: طيب ..
وفعلا" حطيت يدي عالمصحف وحلفت... !!
وفجأه طآحت علي
وصارت تبكى بكاء قوى مره
وتقول: يا ويلي على عيالي
أنا إندهشت وقلت: عما عما ان شاء الله << "هاذي الكلمات اللي كانت تسمعهآ كل يوم"
قلت لها : وش فيك ؟
قالت: أكيد بتموت أو أنا بموت وبيتيتموا عيالنا.
انا قلت : تعوذي من ابليس .........
ويواصل صاحبنا سرد قصته او فلمه كما سماهـ.
يقول كان الحال بدأ يعجبنى واستمريت بنفس الكلام المعسول صرت امدح بلبسها واثنى على ذوقها بإختيار الالوان !
وبعد اسبوعين على هالحال....
يذكر صاحب القصة انه والله العظيم بدأت المدام تتغير بعينى وصرت ما اقدر ابعد عن البيت
حتى وانا بالبيت لو راحت تسوى شي
أحس انها تأخرت كثير وصرت كأني بـ أول أيام الزواج.
حتى شكلها اتهيا لي انه تغير و إن وجههآ صآر أنظَر
وخدودها كأنها مورّدهـ
وأنا أفكر وأقول يمكن لما سمعت الكلام الحلو إرتاحت
ونفسيتها صارت حلوه وأثّر عليها كذا
جاني إبليس وقالي: لا تضحك على نفسك هاذى رفيقتك الى انت خابر أول... < إهب !
وتعوذت من إبليس.
لكن اللي صار حقيقه
ومو تهيئات حتى أولادي تغيروا وصرت ما اسمع زعاقهم الا نادراُ
وهو اللي كان يلج بآذنى حتى وانا بالدوام.
صاروا يحبوا بعض ويخافوا على بعض .
يقول الحبيب صرت أسمع منهم صباح الخير يا بابا و تصبح على خير يا بابا
وهالشى كنت اشوفه بالمسلسلات وأضحك
وأقول مستحيل يصير هالشى بـ أي بيت سعودي
مهما بلغت تربية الاولاد ومهما بلغت مثالية الاب والام ...!!!
ويستمر صاحبنا بسرد قصته ويقول انا لاحظت اختفاء الكريمات الى دائماُ مرصوصه عالتسريحه.
ولما سأل زوجته قالت كان زمان انا الان ما استخدم اي شي حتى زميلاتي مو مصدقين إني
ما استخدم شي لبشرتي ويقولوا لو تحلفي ما راح نصدقك.
ختاماً ...
هل يعقل أن الكلام الحلو يحدث هذا التغير ؟
فعلا الكلمه الطيبه أصلها ثابت وفرعها في السماء ..
الله يهدي ماخلق ..
سبحانه جل في علاهـ
منـ ق ـول من إيميلي
لعل فيه فآئدهـ