احبك عساك تعرف بأن الغلا له تقدير


أنا بخير ياللي جيت تسأل عساك بخير
ولا شي ينقصني سوى شوفة عيونك

على حطة إيدك .. مالك الحب والتفكير
ولا أحب غيرك .. غير منهم يحبونك

وصدري لحبك .. مثل صدر السما للطير
تجول بصدري ..دام صدري غدى كونك

على خافقي رافع شعار .. الكبير كبير
ولو تجتمع كل البشر .. ما يساوونك

أحبك .. عساك تحس بالحب والتقصير
ذبحني غيابك .. مو مهم من يذمونك

أحبك .. عساك تعرف بإن الغلا له تقدير
ذبحني برودك .. آلله يلوم من يلومونك

تبي تعرف إنك غير عندي .. وحسنك غير
تلفت .. تشوف إن النسا ما يطيقونك

يغارون منك .. ودم قلبي عليك يغير
ولا عندك إلا : كيف حالك ؟ وشلونك..!

آنا بخير ياللي جيت تسأل عساك بخير
ولا ينقص عيوني سوى شوفة عيونك

آنا بخير لكن دور لحالتي تفسير
ينادوني وأحـس فيهم .. ينادونـك

أحسك بداخل روحي وبالعروق تسير
والله يعلم كأنني صرت مجـنونك

أحبك.. وأحبك حيل من يوم كنت مجروح
على كثر ما أحبك .. على كثر ما أصونك

من زمــــان وصدري لسر حبك بير
وأخبيك في قلبي لجل ما يشوفونك

أحب الحكي عن زود حسنك وأعكس السير
أخاف أتكلم عن جمالك .. يعرفونك

تشوف الحمام يطير ؟ قلبي معاه يطير
إذا جيتني قبل اللقا تسحب ردونك

فديتك .. ترفق بس .. واللي تبيه يصير
ولو قلت: جيب الشمس .. بقول : لعيونك

بحاول ,, وإذا إني ما قدرت.. العفو يالأمير
ترى قدر حبك فوق طاقات مضنونك

ولو تعرف اللي لك بقلبي من التقدير
وربي بتحلف إن أهلك ..ما يحبونك



ممـــا لامس احساسي



بـنـت الـنــور