ليت الورق يقرى وش اللي انكتب فيه
وليت القلم يدري وش اللي جرابه
الغايب اللي يغلي القلب طاريه
ماقل قدره لويطول غيابه
والشعر لويفقد حروفه وأساميه
مدري وش اللي بعدها ينبغى به
احترت بين اعتب عليه واراضيه
أخاف لايجرح رضاه بغيابه
احيان اقول ابيه واحيان ماابيه
الا ابيه ولو يبي لي عذابه
ياللي تجونه دامني ماأقدر أجيه
وصوا (ذهابه) لا يشح بايابه
وقولوا له اني من كثر ماأغليه
أشرب سرابه وارتوي من سرابه
وعلى كثر مانسى اذا قلت ناسيه
دار الزمن وجاب عشقه وجابه
حنيت لأيامه وضحكة لياليه
قبله وبعده كل وقتي رتابه
ان لمت قلبي عاقبتني محانيه
وان قلت بارضي عز نفسي رقى به
البارحة كنت اكسر الروح وانهيه
كان الورق أرض وعيوني سحابه
زرعت ماأحبه ولا عاد لي فيه
وجنيت أحبه لو يطول غيابه