على مفرق بدايات الجروح ودمعة المقهور
عرفت ان الزمن لا شان وجهه ماتت آمالي
أشوف الحزن ماخلا على وجه البسيطه نور
اجر الصوت واغني على جرحي وترحالي
اوسع خاطري وادري تضيق من الهموم صدور
وعسى الله مايطول ضيقة الخاطر على بالي
على كثر اتجاهات الوسيعه مالقيت عبور
اشوف الكون بعيون الجريح وغربته جالي
على كثر المواجع والأسى ياحظي المعثور
امني خاطري واضحك من همومي على حالي
اخفي بعض مافيني وبعضي لاحكى معذور
مادام العمر ماوقف على حزني ولا اطلالي
انا ماألوم اغصان الشجر لا ودعت عصفور
مادام العــش ذكرى وش بقى للريح تغتالي
على حر المشاعر وش بقى يا صدري المهجور
نساك الود وعروقك جفاف(ن) مالها والي
تمادى الليل بعيون السهر يالخاطر المكسور
وانا ماملك من الماضي سوى همي وغربالي
مع ذاك الحنين اللي سرى في ظلمة الديجور
شـحـب وجـه الزمــان اللي بغيت ولا تهيالي
يطول الصمت ماحرك على بيض النوايا سطور
و انـا مهمـا تنـاســيت الـزمــن لابــد يطـــرالي