ياهيه ياللي قسيت ولا كفاك العذول
كل الاماني بعد ما غبت كومة حطام
اقعد مع الناس وانت اللي بفكري تجول
لو سلموا قلت في بالي عليك السلام
اعاتبك للغياب وتبتسم لي تقول
تقوى عتابي واضيّع بعدها للكلام
لك فالحشا موقع ٍ صعب ٍ اليه الوصول
عجز الزعل لا يجيله لو عليه ابترام
لك ابتسامه عجيبه تستميل الزعول
ولك وحشة ما تخليني بروحي وانام
شف كيف لاجاء علي الليل شلت الحمول
الليل مظلم وصدري من غيابك ظلام
لاصار جرحي جريء ودمع عيني خجول
قل لي هنا كيف اوازن بينها بالتمام
المشكله كان ما للمشكله من حلول
لاصار قلبي معلق في حبال الغرام
ان طاح ميت واذا يبقى معلق يطول
وقت القلوب الدقيقه تنحسب مثل عام
ارجوك عندي سؤال ما طرحته فضول
اللي تسويه فيني هو حلال او حرام