من عام الاول نبض الاحساس مجهول
كنه غريب ٍ داخلي تاه فيني
ذبلت ورودي وانثنى العود مقتول
وهبت رياح الحزن ترثي سنيني
ليل ٍ يعاني واشرق الصبح مذهول
صبح ٍ تمنى حيل بينه وبيني
موعد لقا ياللاسف دون مسؤول
ضاع المكان وخطوتي تحتريني
تاخذني اقدامي وتقطع بي سهول
مره تسير ومره تقول ويني
ارجع معي واقول يالدرب معقول
معقول هذا اللي اشوفه بعيني
اقرب من اطرافي وهي عني جفول
اطرد سراب ٍ وسط راحة يميني
المسأله أكبر من افهام العقول
المسأله جرح ٍ يقول اعربيني
المشكله نفس ٍ ضعيفه بلا حول
عادة مساريب النفس تشتكيني
حتى الوفا في وقتنا صار مخذول
والصدق لو ينطق يدنق جبيني
ياليت تفكيري عن الناس مشغول
وارتاح في دنياي كانت تبيني
لا همني طفل ٍ ولاحال معضول
ولا همني وضع ٍ شرق به حنيني
أحسن من اني فاهمه واكتم القول
بين العرب ماعاد ينفع عضيني
كل ٍ تسيّد لكن العقل مفصول
وقول الحقيقه في زماني اشتميني
أنا وحرفي نحسن الفعل والقول
واغلب حروفي ان عصاني يجيني
واكبر ذنوبي مرسم ٍ خط مرسول
راح الورق يشكي قساوة يديني
ارجع واقول اكبر من افهام العقول
الم سأله جرح ٍ يصيح انقذيني