يا سيّد جنيد..ما مرّك زبون الغرام






يا سيّد جنيد..ما مرّك زبون الغرام
إللي خذا قلبي من العام..ما رجّعه


إستأذن الصدر به يومين..ماقال عام
ليته صدق مع معاليقي قبل ينزعه


خابْرّه يعشق دهن عودك..وريح الغمام
إللي ليا طاح كنه باليدين أجمعه


وخابره يعشق عطور ٍ بالرفوف الأمام
ذويّق .. حتى ليا آشر عليه بصبعه


له بالحنايا آثر جرح ٍ عميق وسهام
وله في ثيابي بقايا من عطور ٍ معه


ما مرّ في سكة أيامي مرور الكِرام
في آخره حزن..والآحلام في مطلعه


ما قصّر بشوق يوم الله عطاه الهيام
وما الله هداه و ذخر ضيق الوعد من سعه


ما نقّض إلا العهود إللي عليها الكلام
وما حطّم إلا خفوق ٍ كان له مطمعه


لا والله..إلا سرق منّي لذيذ المنام
ياليت له في طريق البعد ما يمنعه


مديت له غصن زيتون..وحمامة سلام
وما مدّ لي غير طعنات الجفا الموجعه


يا أصدق من الوبل وعروق الضماير حيام
إن كان وصلك يبل الروح..لا تردعه


الله وهبني لك العاشق..وصرت المرام
مرامي إللي عسفت العمر لجل أتبعه


ولا ردني عنْك..كود سلوم ربع..وحرام
وقول العرب كان ما طاعك زمانك طعه


وإلا إنت لي مثل فرض الآكل بعد الصيام
يا آلذ ما ذقت بعيوني وعجزت أشبعه


إي والله إني أحبك..لا عليّ الحرام
أموت بك حيّ..ياآغلا العمر..لا أمتعه


الليل مركب هل الذكرى..وستر الملام
وعيونك البحر..ورموش العيون..آشرعه


وفي كل ليلة مع طيفك..اعَقد الخصام
وافلّ شرهاتي بصوتي..وأرد أسمعه


ما ضاق بي الكون..ضاقت بي..بيوتٍ وخام
يا كنّ روحي على الضيقات..مستنفعه


تطمّن الشعر بعدك..عن حلاياك صام
من هاجس الشوق..وضنون الغلا تدفعه


فإن كان مالك بعد فرقاي..نية سلام
لا ترجع القلب..كانك مآنت راجع معه

مما راق لي

بـنـت الـنــور