-*™£ منتدى آل شراحيل بفيفاء£™*- - عرض مشاركة واحدة

بسم الله الرحمن الرحيم
السلام عليكم ورحمة الله وبركاته

حوار بيــن العقل والقلب ...

العقل :

أنا الأهم أكيد لأني أفكر.. وأبدع .. وأتصور.. وأستنتج ..
وحتى مكاني فيه شموخ لأني في رأس الإنسان .. وأنت اذا كلمت شخص تطالع راسه ما تطالع بطنه أو قلبه ..

القلب:

تقصد تقول اني أنا الأهم,, لأن الدم اللي يوصلك ويحرك خلاياك مني أنا
أنا اللي لي الفضل في تفكيرك
أنا أحس.. وأنبض .. وأحب .. وأشتاق

العقل:

من غيري انت قلب مجنون

القلب:

ومن غيري إنت عقل مجرد من المشاعر .. ما عندك احساس

العقل:

ومين اللي محتاج المشاعر في هالوقت ؟؟
حنا في زمن سرعه وتطور.. عصر الكمبيوتر والصواريخ والقوه
هذا الزمن زمني أنا .. ما عاد لك فيه مكان
أنا تركتك هناك .. عند قيس وليلى يشبعون منك
تكفى وش اللي جاهم منك الا الغثا وعوار الراس ؟؟
هي تزوجت واحد ثاني وهو انهبل وصار يدوج بالبراري

وش نفعتهم فيه يوم حكموك عليهم ؟؟

القلب:

كل التطور اللي تقول عليه هذا ما يغني عن لحظة مشاعر صادقه
اذا انكرتني بتكون غبي
عقل الشاعر في قلبه .. عقل الفنان في إحساسه
قول لي مين ما يعرف قيس ؟؟ وليش عرفوه ؟؟ عرفوه لأنه حب من قلب موب من عقل !!
يمكن يكون أعطى قلبه أكثر من اللي يتحمله لكنه أبدع في النهايه ملا الدنيا أشعار وكان أجمل مثال للوفاء

العقل :

بلا خرابيط فاضيه!! حب وشعر ووفاء !!
الإنسان من غير عقل ماله الا مسمى واحد بس مهما اختلفت أشكاله

( اهبـــــــــــل )!!!

القلب :

وطيب عمرك شفت إنسان يعيش أصلا من غير قلب !!!!
بدون قلب يكون الإنسان ببساطه

(ميـــــــــــت )

العقل:

أقبل أموت وأنا عاقل وذكي بس أرفض أعيش أهبـــــــل ..!!!!

القلب:

وأنا أرفض إني أكون عاقل ومجرد من الإحساس.. أرفض أكون ميــت..
لا تحاول تنكر ... إنت من غيري ما يمكن تكووون أصلا .. وجودك مرتبط فيني أنا ..

العقل:

وانت من غيري طايش.. أهوج .. مخفه
كلمه تاخذك وكلمه تجيبك

حوار طويل لا يمكن أن ينتهي ..
القلب والعقل مثل الميزان .. لو رجحت كفة واحد على الثاني يختل توازن الإنسان ويصير مثل الأعور .. يشوف بعين وحده بس
وفي النهايه ما اعتقد فيه احد يقبل يكون أهبل .. أو يعيش ميـــــــــــت