الحب وثقني لو ان مالـه اوثـاق
متـى يحررنـي ويطلـق وثاقـي
الله من هم على صـدري انسـاق
يسوقني وانا معه فـي انسياقـي
من كثر ماسبب لمعلوقي احـراق
جرى خزين العين جري السواقـي
أشرب قراح الماء ولاأبل الاريـاق
شراب من حدّه زمانـه وضاقـي
كني لكاسـة علقـم المـر ذواق
من مرها ماعـاد أميّـز مذاقـي
ياصاحبي من جور الايام وش باق
دام الزمن ضيّق علـي الخناقـي
جيتك وانا في الحب هايم ومشتاق
من زود حبـك مابقالـي بواقـي
لو لا الهوى مابان حزني بالاحداق
ولو لاك ماطاح المطـر بإندفاقـي
هل السحاب وهل حزني بالأوراق
وكتبت عن حبـي وزود اشتياقـي
مشتاق لك وانته تجازيني فـراق
كنـك تـدور مايعـزز فـراقـي
تقفي وأنا بقفايتك مالـي اشـراق
مثل الظلام اللي عن النور واقـي
عطيتك المعلوق وتقـول مـالاق
ان كان ذا مالاق وش انت لاقـي
ياشينها دام انـك اتمـد بإنفـاق
ولاتحصّـل غيـر قـل ونفاقـي
خلاص ياقلبي كفى حب واشـواق
أشقيتني مع قلب ماهوب شاقـي
صبرك لو ان الصبر ماهوب ينطاق
يمكن يحررني الزمن من وثاقـي