سبحانه اللي يدوم وغير وجهـه مـادام
بأمره يمـد الشفـاء والغمّـه يزيلهـا



العالي المؤمن العـدل الكريـم السـلام
الوالي اللي جميع الخلـق والـي لهـا



أعوذ به من شرور الجن وبغض الأنام
ومن عقدة أهل العقود ومـن محابيلهـا



ما يحذفون الحلال ألاّ عيـال الحـرام
ناس ٍ نغزها بليس وقـام يومـي لهـا



اللي في قلبه صدا واللي في خشمه عرام
وكبودها سود مدري ويش اسوي لهـا



الحمـدلله زان الحـال والحـظ قــام
ولدن لقـاح الليالـي وأحملـن حيلهـا



بانت وجيهٍ تبادلنـي غـلا وإحتـرام
وغابـت وجيـه ٍ تجاملنـي بتمثيلهـا



والحيّه اللي تشيل السـمّ والسـمّ سـام
أقـرا علـى راسهـا وتـردّه لذيلهـا



مابيني وبينكم يا أهل الضغايـن كـلام
ألاّ الفلق .. وآية الكرسـي وترتيلهـا



ولا حلّقت فالظلام ألاّ طيـور الظـلام
واليا انتفض ريشهـا شبّـت قناديلهـا



شكري على البندقيه والفشق والحـزام
وأم المفاتـيـل تنجيـهـا مفاتيلـهـا



واقف على حيلي وهجسي طواه الحيام
عسى القصيده معي تآقف على حيلهـا



تقول بيني وبين الشعـر نقطـة نظـام
من يردع اهل المثايل عـن تماثيلهـا



والنبره اللي في صوتي من ثلاثين عام
أطيـح واحطّهـا .. وأقـوم وأشيلهـا



ترادفت واستقامت والطريـق أستقـام
وأستقتهـا حسـب معناهـا وتأويلهـا



الضبط والربط لو ما جاء على مايرام
الجابـه المايلـه مـا يعتـدل ميلهـا



عز الله اني قنعت من الهوى والغـرام
وسرّتني اللي على ليلي .. سرا ليلهـا



حمامة ٍ من لحنها غيـر كـل الحمـام
أمسيت معها تغنيّ لي .. وأغنـيّ لهـا



يا شين حبٍ يجي بين اللحـم والعظـام
ما يجني من الضلـوع ألاّ محاصيلهـا



يا صاحبي لو نقول الطقّ فـك اللحـام
طقّ المواليف مـا يقطـع مواصيلهـا



وشلون ما أهتمّ بك وأنته محط إهتمـام
ومحبّتك في ضميري مسـرج ٍ خيلهـا



أربط حزام الأمان .. الخوف ماله حزام
وأخفض جناح الموده لين أعـديّ لهـا



تعال يكرم جنابك يـا عزيـز المقـام
بلاش من طـاري الدمعـه ومنديلهـا



أقول أحبك وأنا صادق علـيّ الحـرام
لازال غيـث المشاعـر دارجٍ سيلهـا



أما أستملني غلا .. وألاّ عليك السـلام
لابـد فرقـاك تاصلنـي مراسيلـهـا