طير الهوى ستّل على الحوم بسبوق

وعين الهواوي عاجزة عن مناله

زادي وشربي صار عندي بلاذوق

ولاعاد اذكر في حياتي سهاله
ياليت لي قلبٍ عن الحب معتوق

مايحكمه بدر الزمان وخياله
ماكنت أسابق طلة البدر من فوق
ولا اتعبت عيني بالنظر في مجاله
مافادني كثر انتظاري مع الشوق

ولافادني صبري وزود احتماله
(ياوحشتي) والشمس هي مالها شروق؟!

أظلم نهاري عقب ظلمة لياله !!
أنا اشهد ان قلبي تولع بمخلوق

أمسى مكانه خاليٍ من حباله
شفت الحزن تسبق بروقه مع الموق

مات الحكي والقلب ينبض رساله !!
لامست صدره وانفتق نزف وعروق

وزاد الخفوق بسعرته واشتعاله
حاولت أضمه ضمة الأم برفوق

مير البلا يومٍ صفعني سؤاله !!
يامزون ليه العمر سبتك مسروق؟!

وليه العذاب بنزلته وارتحاله؟!
الله يصبرني على الجرح والعوق

من قبل قبري تستوي بي رماله