جس نبض الباب قبل الطرقتين.. وجس لوحه

***

قال يا كثر اليدين اللي تقول الدار خالي


ما صحا فالباب.. بعد الطرقتين الا الملوحه

***

والغبار اللي على الدرفه حثا وجه الليالي


صاح ياهل الدار.. واشعل فالفراغ الشرس بوحه

***

وانمحى في دمعتين وحس شي من التعالي


في يدينه كان مفتاح الغياب يشد روحه

***

للغبار وخندق الجدران حول الباب عالي


قال غاب الدار مدري غاب عني في وضوحه

***

هو انا اللي جيت صوب الدار والا الدار جالي


والغبار اللي على المدخل تقضب في جروحه

***

ما لفيت الا على ريح تذره في سؤالي


اسمع ايام تردد من وراء الباب السموحه

***

ما نعرفك.. من تكون.. وليش ثاير وانفعالي


كم ذبل فالروح نجم وضاقت النفس الطموحه

***

والحياة اللي طوتك هناك صلفه ما تبالي


وانمحت فيك الدروب وصارت الخطوة شحوحه

***

وجيت لا حادي ولا خيال مظهرك ارتجالي


هز راسه في برود وصمت واوغل في نزوحه

***

قال يلقى الدار بعد الطرقتين احدٍ بدالي


كان وجه الباب راكد ما عليه الا الملوحه

***

والغبار اللي على الدرفه يقول الدار خالي