هذا الذي واجب نسميـه فـزاع
يوم المراجل تتعـب اللـي طلبهـا

اثر العجم فيهم مغاويـر وسبـاع
ماهي على ماقيـل حكـر لعربهـا

فهق ووخر داوي السيل بـذراع
ويوم المنايا حولـت لـه ركبهـا

مجدافه اذراعه وكفه لـه اشـراع
والسيل لامن شدها قـال جبهـا

اربع طعش مابين شـاري وبيـاع
لله در القـرم يومـه جذبـهـا !

يوم الردي واقف يطقطق بالاصباع
’’فرمان ’’ روحه دزها ما حسبها

ياوي من رجال ماهـوب مخـراع
العمر جولـه والسنافـي كسبهـا

ماهو مثل بعض الهلافيت الاوضاع
اللي نهـار السيـل قلـت أدبهـا

لو تلمسه شمس الضحى الدافيه ماع
وشلون اجل لو تحرقه فـي لهبـا ؟

لا تقول حد السيف ماهوب بتـاع
لكن ما كل مـن قضبهـا قضبهـا

ولا تقول مهره مار ماهيب مطواع
دامك ما تفرق راسها مـن ذنبهـا

الحر يكفخ فوق ما يقضب القـاع
لو هي على تسبد الخضيرا قلبهـا

يارب وجهني على درب الاسنـاع
شاعر واسوق من الفرايد ذهبهـا

مابغى القصيده تدخل السوق وتباع
ودي بقولة يسلـم اللـي كتبهـا