ضاعت احلام السنين وخانت القلب الحكايا

وانقفل باب الامل في وجه من قاد السفينه

وارتعش جسم المريض وقالوا الطب الكوايا

والكوايا موجعه والنفس خمتهـا الغبينـه

كل مالديت عيني لجـل اناظـر بالمرايـا

انكسر قلبي وسالت دمعة العيـن الحزينـه

ااااه ياصغر المساحه واااه ياضيق الزوايـا

واااه ياحزنٍ تفجر واشتكت منـه المدينـه

الشوارع فوضوتها عمـت بكـل النحايـا

والمنازل تشتكي من بعد فقـدان السكينـه

قصةٍ فيهـا مواجـع جمعـة كـل البلايـا

واحذفتها وسط قلبٍ ضمها فـي راحتينـه

ماهقيت ان الشجيع اللي فعل كل السوايـا

يجحدونه كل ابوهم ياعـرب قـدام عينـه

ينكرون افعاله اللي بعدها صـاروا طنايـا

ولجل قدر وحب غيره عيد صاروا بايعينـه

مير بنسى ماحصل واقول يـارب العطايـا

تفرح اللي مابخل في شي وانتم خابرينـه

واتغزل واتهنى في هـوى زيـن الصبايـا

الهنوف اللي خذاها قلبي العاشـق رهينـه

حبها في وسط قلبي قام يبنـي لـه قرايـا

والغلا جاها وداعبها وهي مسكـت يدينـه

الشفايف جمرتين وفوقهـا تـوتٍ طرايـا

والخدود اتشابه الورد الحمر في كل حينـه

والخصر لامال كنه ميلة غصـونٍ روايـا

هبها النسناس وامست تنثني من كل لينـه

كل مامالت وقف قلبي لهـا بيـن الحنايـا

وابتدى جو القصيد وجاب الابيات الثمينـه

سهرةٍ فيها الغلا والحب مع عذب السجايـا

تنعش اللي غاب عن داره وربعه فاقدينـه

زينها يخجل بنات الكون لو صفنٍ سرايـا

وغير ذاك الزين دايم ياعرب بنتٍ فطينـه

حبها يجري بدمي وترتوي منـه الخلايـا

والوله والشوق عم القلب في باقي سنينـه