على ذكر المواجع والسفر والحل والترحال

طويت آخر ورق عندي في دفتر احزاني

طويته وانكسر قلبي وصوتي بالمواجع سال

ودريت ان الظلام اللي تحت كف السهر جاني

جلست اجمع مسافاتي واغني للسفر موال

على صفحه من الماضي بها حلمي وعنواني

بها كم سافرت زوحي وانا بالليل وحداني

حبيبي ليلة البارح مشيت من الغرام اميال

واناظر رحلة الذكرى هدب عينه يغطيني

حبيبي كل مااشوفك تجي بالذاكره تختال

نهر من فايض الذكرى يجي من داخل اشجاني

تخيل يوم عانقني خيالك خاطري وش قال

تخيل قبل اسولف لك نشدني عنك وجداني

نشدني لين خلاني مدينه هزها زلزال

تخيل ماهدى حتى لقاك بوسط شرياني

اروح لسدرة الموعد معاي لموعدك مرسال

واخاف انك تجي قبلي وترحل قبل تلقاني

هنا كانت ليالينا الغلا والمقبلات آمال

وهنا كانت مواعيدك مطر تخضر به اغصاني

هنا كانت نواظرنا سوالف في كلام اطفال

وهنا كانت عصافيرك على دربي تحراني

هنا شف باقي آثارك على رمل الوعد مازال

وهنا شف دمعة طاحت من عيوني على شاني

حبيبي لاتنشدني عن اوضاعي وكيف الحال

انا بعدك سحاب ابيض اضم الريح بأحضاني